Game Review by (Ezz moka)

اجمالا اللعبة ممتازة و واحدة من افضل الألعاب اللى لعبتها من سنين

و اعتقد انها هتنافس بقوة على game of the year

انا مقتنع انها كان ممكن تكون أفضل لأنى مع Arena net من 2006 و عارف هم بيطلعوا الحاجة شكلها عامل ازاى ..

كم الbugs اللى فى اللعبة كتير و تحس ان اخر مناطق فى الخريطة اتطلسقت بسرعة و مخادتش حقها

وجهة نظرى ان اللعبة نزلت قبل ما تخلص 100% .. او على الأقل 100% من اللى كانت a.net كانت عاوزة تعمله

و خاصة السيناريو بتاع وقت نزول اللعبة كان مفاجىء شوية .. انا كنت متوقع انها تنزل فى 2013 لأنى متابع كل اخبار اللعبة من اول ما أعلنوا عنها

ممكن يكون ال publisher بتاعهم NC soft ضغط عليهم لأن فترة التطوير طولت و ممكن كانوا عاوزين اللعبة تنزل قبل WoW:MoP عشان المبيعات متتأثرش

فممكن تكون anet اضطرت انها تنزل اللعبة بسرعة و يكملوا شغل و اللعبة شغالة ..

فى كذا واحد من المبرمجين صرح انهم شغالين فى حاجات كتير ..

الطبيعى ان المبرمج لما اللعبة تخلص مش بيشتغل كتير .. هو بس بيكتشف الbugs و يحلها

عموما بغض النظر عن السيناريو احنا هنتكلم عن اللعبة

الجرافيكس: 10/10

افضل جرافيكس شفته فى لعبة MMORPG لحد دلوقتى .. مفيش كلام تانى ممكن يتقال :D

الgame play: 10/10

اللعبة بتقدم نظام جديد فى اللعب فى كل حاجة تقريبا من اول ما و انت بتعمل الشخصية لحد ما تعمل كل حاجة .. و ده سلاح ذو حدين .. لو انت متعود على النظام القديم و مرتاح له ممكن ميعجبكش النظام ده .. اما لو انت زهقت منه و ده الطبيعى صراحة فجهز نفسك لنقلة كبيرة جدا فى طريقة لعب الMMORPG

مبدئيا مفيش نظام واحد تانك و واحد هيلر و شوية ناس بتعمل دامج و تنزل تكتكة فى الزراير لحد ما تخلص و ممكن تعمل كده و انت مش باصص اصلا .. و ده من واقع تجربتى الشخصية فى العاب كتير

خلاص الكلام ده انتهى ..

دلوقتى فى damage, support and control .. اى شخصية ممكن تعمل اى دور من التلاتة بكفاءة تامة و ده تفسيرهم باختصار

damage: مش محتاجة تفسير متهيألى :D

support: مش بتعمل دامج مباشر و لكن بتخلى الناس اللى بتعمل دامج تعمل دامج اعلى و بتزودهم بbuffs و heals

control: بتمنع العدو انه يعمل دامج و ده بيفرق جدا فى المناطق الصعبة

مفيش حاجة اسمها كويست .. قصة انك تروح تدور على واحد فوق راسه علامة تعجب يقولك اقتلى هبروميت واحد من ده او لملى دوبروميت واحد من ده او خد البتاع ده وديه للواد اللى واقف قدامى بنص متر و اما تخلص تعالالى و ممكن تلف الكرة الأرضية كلها عشان تخلص كويست .. الكلام ده انتهى و حل محله حاجة اسمها renown heart و ده اماكن فى الخريطة بمجرد انك تقرب منها بيكون فى مهمة معينة فى المنطقة بتخلصها و الجايزة بتجيلك لحد عندك يعنى ممكن تخلص المهمة من غير ما تشوف ال NPC اساسا :D و غالبا بيكون فى event قريب من مكان المهمة 

ال dynamic events دى فكرة arena net لتحل محل فكرة ال raids القديمة .. و للأسف انا شايف ان اكتر خاصية فى اللعبة متفهمتش كويس هى ال dynamic events لأن الناس لسه بتلعب بالفكر القديم .. بيشوف event يدخل يدب فى اللى قدامه و بمجرد ان الevent يخلص يجرى يشوف حاجة تانية يعملها .. غلط .. و هتلاقيه بعد شوية زهق و يشتكى ان اللعبة مش حلوة و مملة و ان الevents مكررة

معظم ال dynamic events بتكون فى سلسلة ليها حالتين .. النجاح التام او الفشل التام .. اما بتخلص event فى السلسلة بيكون فى event بعده احيانا بيتطلب منك حاجة تعملها و غالبا بشتغل لوحده بعدها بدقيقة او دقيقتين .. لو الevent التانى فشل السلسلة بتوصل لمرحلة الفشل التام و بترجع تانى لنقطة الصفر تيجى بعد شوية تلاقى نفس الevent تعمله و تجرى على حتة تانية ترجع السلسلة تانى لنقطة الصفر و الحلزونة يامّا الحلزونة .. كلف خطرك و استنى فى المكان اللى خلصت فيه ال event الأولانى دقيقتين او اسمع كلام ال npc اللى موجودين ممكن يكون مطلوب منك حاجة تعملها عشان الevent التانى يشتغل و اوصل لمرحلة النجاح التام اللى فى الأغلب بيكون ليها تأثير على العالم اللى حواليك

نموذج صغير اول event مطلوب منك انك تحرس مجموعة هتمشى من مكان لمكان .. اما توصل للمكان هتلاقى مجموعة من x محتلة المكان و بعد دقيقة ال event التانى هيشتغل فانك تساعدهم ياخدوا المكان من x اذا نجحتوا بعد دقيقة هيشتغل event تالت ان x هيحاولوا ياخدوا المكان تانى و انت مطلوب منك انك تحمى المكان اذا نجحتوا هيشتغل ال event الرابع ان الboss بتاع x هيهجم على المكان اذا نجحتوا هيبقى وصلت للنجاح الكامل و هيفضل المكان مع المجموعة .. طبعا لو انت سيبت المكان فى اى مرحلة السلسلة هترجع لنقطة الصفر و هتقعد تعيد و تزيد فى ال event الأولانى

غير ال renown hearts و ال dynamic events فى personal story و دى مهمات خاصة لكل واحد لوحدة و دى بتلعب فيها لوحدك او ممكن تدعو حد ييجى معاك .. بس زى ماهو باين من الإسم دى personal story بيدخل فيها الخيارات اللى اخترتها و انت بتعمل الشخصية

ده غير ان فى 8 dungeons كل واحد فيهم له 4 مسارات مختلفة .. يعنى 32 dungeon و بتبدأ تدخل dungeons من اول لفل 30 

و فى gathering و crafting برضوا نظامهم مختلف

و فى player vs player و ده بيتكون من نظامين حاليا و غالبا هينزل انظمة جديدة .. فى structured PvP و ده عبارة عن ماتش سريع بين فريقين و فى World vs World vs World و ده عبارة عن 3 سيرفرات بيتخانقوا مع بعض فى ماتش لمدة اسبوع و السيرفر الفاير بياخد جوايز تفيد السيرفر كله و كل واحد فيهم موال لوحده و مش هعرف احكى عنه هنا

فى كلام كتير جدا ممكن يتكتب بس عشان مطولش كفاية كده :D

الصوت: 7/10

للأسف الصوت مش بالكفاءة المطلوبة على الرغم من انى بحب ال soundtracks بتاعت gw1 بس استغربت لما لقيتهم فى gw2 لدرجة انهم اكتر من الsoundtracks الجديدة .. مش فاهمهم الصراحة .. فى حاجات صوتها مزعج فى اللعبة .. اوقات بتلاقى الصوت متأخر عن الحدث

القيمة: 10/10

مش مطلوب منك غير انك تشترى الCD-Key و مش مطلوب منك لا اشترك شهرى و لا انت مضطر انك تشترى حاجات من item mall و قصاد ده بتاخد كم مهول من اللعب .. قيمة ممتازة

الدعم الفنى: 8/10

الدعم الفنى ساعات بيتأخر على ما يحل المشكلة بس هم لحد دلوقتى شغالين كويس

المجتمع: 9/10

حاجة معروفة من ايام gw1 ان معظم الناس اللى بتلعب متعاونة جدا و ظريفة جدا و ده لأن اغلبهم كبار فى السن إلى حد ما مقارنة بباقى ال MMOs .. كان فى مشكلة ضخمة فى ال bots و ال gold sellers اول ما اللعبة نزلت بس انا ملاحظ ان عددهم قل جدا و anet صرحت انها قفلت 1800 حساب فى اسبوع واحد بسبب البوت و بياعين الجولد و بيقولوا انهم فى طريقهم للقضاء عليهم نهائيا

التقييم النهائى: 9/10

اللعبة جميلة جدا .. فيها مشاكل محدش يقدر ينكرها بس عمرك ما هتحس ان المشاكل دى هتمنعك انك تستمع باللعبة

و زى ما قلت قبل كده اللعبة فكرها مختلف لو حاولت تلعبها بنفس الفكر القديم مش هتعرف تستمتع بيها

و اكبر ميزة فى اللعبة دى انها بتحترم الإنسان و وقته و عقله مش مطلوب منك انك تلعب 15 ساعة فى اليوم و تعمل نفس الحاجات كل يوم عشان تفضل فى الدايرة و ميفوتكش القطر و تلاقى نفسك اتركنت على الرف .. إلعب وقت مانت عاوز بالشكل اللى انت عايزه و الكمية اللى انت عاوزها و عمرك ما هتحس انك متأخر عن حد و اللى مخلى الموضوع ده ممكن ان مفيش اشتراك شهرى ..

لو انت من الناس اللى بتقعد 15 ساعة فى اليوم برضو حطولك حاجات زى legendary weapons ممكن تحطها هدف ليك عشان تجيبها و ده اللى عملوه بيقولوا انه محتاج اكتر من 400 ساعة عشان تجمع الحاجات المطلوبة ليه